Kujtohet masakra e Pastasellës, kërkohet angazhim më i madh për të pagjeturit
Lajme
Lexohet për: 3 min.
4 ditë më parë
Linku u kopjua
Në fshatin Pastasellë të Komunës së Rahovecit është shënuar të hënën 26-vjetori i masakrës ku u vranë dhe masakruan 106 civilë shqiptarë nga forcat serbe gjatë luftës së Kosovës, raporton KosovaPress.
Ministrja në detyrë e Drejtësisë, Albulena Haxhiu, tha se kjo masakër është një nga më të tmerrshme në Kosovë, ku u shfaq brutaliteti dhe metodat ç’njerëzore të forcave serbe gjatë luftës së fundit në Kosovë.
Ajo shtoi se e vërteta e kësaj tragjedie nuk mund të mohohet e as harrohet, andaj shtoi se do të sigurohen që krimet e kryera të mos mbesin të pandëshkuara dhe kriminelët e luftës të përballën me drejtësinë, transmeton KosovaPress.
Kryetari i Komunës së Rahovecit, Smajl Latifi tha se kjo masakër nga forcat serbe ishte e dhimbshme për të gjallët në Kosovë, por edhe mesazh për ndërkombëtarët se masakra në Pastasellë ka përmasa gjenocidale.
"Lufta për liri kërkon sakrifica të mëdha, sepse liria si nevojë më jetike që kishin shqiptarët u mohohej dhe jeta nën zgjedhjen e robërisë ishte bërë e padurueshme. Edhe banorët e fshatit Pastasellë e përkrahën fuqishëm me krejt çfarë patën luftën e UÇK-së. Ata i dhanë ushtarë kësaj lufte, po ashtu edhe luftëtarin e orëve të para, Milaim Krasniqin. Po ashtu Pastaseli ja dha lirisë së Kosovës edhe dëshmorin Fadil Krasniqi...Kjo ishte një masakër e dhimbshme për të gjallët dhe mesazh për ndërkombëtarët, se krimi në Pastasellë ka vërtetë përmasa të gjenocidit...Plagët e Kosovës edhe pas 26 vjetësh ende kullojnë gjak", tha Latifi, transmeton KosovaPress.
I mbijetuari i kësaj masakre, Tahir Krasniqi, rrëfeu para të pranishmëve momentet sesi forcat serbe i kanë pushkatuar 106 civil të pafajshëm në këtë fshat.
Ndërkaq, përfaqësuesi i fshatit, Afrim Krasniqi i ka bërë thirrje institucioneve vendore dhe atyre ndërkombëtare të punojnë më shumë për gjetjen e personave të pagjetur dhe dënim për keqbërësit, pasi siç tha ai, po pakësohen edhe dëshmitarët.
Për këtë masakër gjenocidale, deri më tani nuk është dënuar asnjë kriminel serb./E.Krasniqi/
