Irani qëlloi me dronë dhe raketa drejt Izraelit dhe shteteve të Gjirit të martën, ndërsa Kryeministri izraelit Benjamin Netanyahu premtoi se vendi i tij do të vazhdojë sulmet ndaj Republikës Islamike, duke thënë se qëllimi i kësaj fushate është rrëzimi popullor i qeverisë së saj.

“Qëllimi ynë është t’i çlirojmë qytetarët iranianë nga zgjedha e tiranisë, por në fund kjo varet nga ata vetë”, tha Netanyahu gjatë një takimi me udhëheqësit e spitaleve dhe sistemit shëndetësor izraelit. “Por nuk ka dyshim se me veprimet e ndërmarra deri tani, po ua thyejmë kockat”, shkruan AP.

Presidenti i SHBA-së, Donald Trump, dërgoi sinjale kontradiktore mbi kohëzgjatjen e mundshme të luftës, duke shkaktuar pasiguri që po ndikon në luhatjet e tregjeve.

Kryetari i Parlamentit iranian, Mohammad Bagher Qalibaf, hodhi poshtë çdo sugjerim se Teherani synonte një armëpushim në luftë dhe tha se do të vazhdojë të luftojë.

Trump vonë të hënën u tha deputetëve republikanë se lufta mund të jetë një “ekskursion i shkurtër”, por disa orë më vonë kërcënoi në një postim në rrjetet sociale se SHBA-ja do të intensifikonte dramatikisht sulmet nëse Irani përpiqej të mbyllte Ngushticën e Hormuzit.