Kosova U19 triumfuese në vëllazëroren me Shqipërinë U19
Kombëtarja e Kosovës në grumposhat U19 ka shënuar sot fitore me rezultat 2:0 në ndeshjen miqësore të zhvilluar kundër Shqipërisë U19.
Ndeshja e sotme u zhvillua në stadiumin “Egnatia Arena” në Rrogozhinë, ku skuadra e grumbulluar nga trajneri Ramiz Krasniqi tregoi paraqitje solide, kështu edhe duke e siguruar fitoren në miqësoren e parë, përcjell KosovaPress.
Fillimisht, rezultatin i pari e zhbllokoi Erion Maloku, i cili finalizon me sukses një rast në minutën e 28’, kështu duke ia dhuruar “Dardanëve” epërsinë prej 1:0.
Në pjesën e dytë, Kosova vazhdoi me paraqitje të mirë, ku edhe e gjeti golin e dytë dhe të fundit të ndeshjes, ku Rinor Tovërlani shënon në minutën e 55’ për rezultatin final 2:0.
Kjo përballje do t’i ndihmojë shumë përzgjedhësit Krasniqi për të parë performancën e gjeneratës së re të futbollistëve, të cilët luajnë për herë të parë së bashku, teksa ajo u shërben “Dardanëve” që të përgatiten për turneun kualifikues të Evropianit që do të zhvillohet në vjeshtën e këtij viti.
Miqësorja e dytë ndërmjet Shqipërisë dhe Kosovës do ta zhvillohet më 28 mars në “Egnatia Arena”.
