Kandidati për kryeministër nga Partia Demokratike e Kosovës (PDK), Bedri Hamza u zotua se nën qeverisjen e tij të ardhshme pagat në sektorin publik do të rriten 50 për qind, do të ketë subvencione nga 100 euro për familjet që regjistrojnë fëmijët në çerdhe private dhe nuk do të ketë pension më të vogël se 200 euro.
Derisa shpalosi programin qeverisës për zgjedhjet parlamentare të 9 shkurtit 2025 në Konventën e PDK-së, Hamza premtoi se nëse merr besimin e qytetarëve në zgjedhjet e shkurtit, atëherë si kryeministër i ardhshëm i Kosovës për të gjitha kategoritë e luftës do të ketë rritje të pensioneve 50 për qind.
Përveç këtyre, Hamza u zotua se do t’i mbështetë bizneset e vogla, për çka shtoi se ato me qarkullim deri në 10 mijë euro do të lirohen nga tatimi. Ai theksoi se do ta eliminojnë tarifën doganore për importin e veturave të reja elektronike.
Kryetari i PDK-së, Memli Krasniqi tha se kjo parti është e pathyeshme dhe testament i qëndrueshmërisë e sukseseve. Ai u shpreh i bindur se Bedri Hamza është kryeministri më i mirë që mund ta ketë Kosova.
I pa kompromis për të ndjekur ligjin e kryerja e punëve në mënyrën më të mirë, profesionale dhe korrekte, janë fjalët me të cilat e përshkruan Doruntina babanë e saj kandidat për të parinë e qeverisë së ardhshme Bedri Hamzën.
