Kryeqyteti i Kroacisë, Zagrebi, do të jetë nikoqir i turneut ndërkombëtarë i arteve marciale të përziera (MMA) për amatorë, "FNC Vikings 2", i cili do të zhvillohet këtë të shtunë, më 13 qershor 2026.

Në këtë ngjarje të organizuar nga Fight Nation Championship, Kosova do të përfaqësohet fuqishëm nga tre luftëtarë premtues të klubit 038 Fight Club.

Ermal Berisha, Dhurim Zenuni dhe Arber Bricori kanë përfunduar përgatitjet intensive dhe janë gati të ngjiten në kafaz për të treguar potencialin e tyre përballë konkurrentëve më të mirë nga rajoni.

Profilat e luftëtarëve kosovarë:

• Ermal Berisha: Udhëton drejt Zagrebit me një rekord mbresëlënës prej 14 fitoresh radhazi. Me një vetëbesim të lartë dhe formë të shkëlqyer, Berisha synon të vazhdojë ecurinë e tij të pamposhtur.
• Dhurim Zenuni: Pas një pune të palodhshme në palestër, Zenuni është plotësisht i gatshëm për të debutuar në këtë skenë ndërkombëtare dhe për të dëshmuar forcën e tij .
• Arber Bricori: Hyn në këtë turne pas një periudhe mjaft intensive stërvitore, me synimin e qartë për të përfaqësuar Kosovën në një prej organizatave më të njohura të MMA-së në Ballkan.

Rinor Gashi ngjitet në kafaz

Përveç pjesës amatore, mbrëmja do të ndizet edhe me ndeshjet profesioniste "Superfight". Luftëtari shqiptar Rinor Gashi (3-2) do të përballet me gjermanin Dana Aghaie (2-1) në divizionin e peshave pendë (featherweight). Kjo përballje, e cila fillimisht ishte planifikuar të mbahej në Mynih, tashmë është zhvendosur zyrtarisht për këtë fundjavë në Zagreb.

Detajet e garës

Sipas njoftimit zyrtar të organizatorëve, turneu do të mbahet në ATT Zagreb.

• Matjet Zyrtare: Fillon nga ora 09:00.
• Ndeshjet Gjysmëfinale: Priten të startojnë në orën 12:00.
• Programi: Përveç rrugëtimit të katër gjysmëfinalistëve për secilën kategori peshash drejt finales, eventi do të kulmojë edhe me tre super-meçe (superfights) që premtojnë spektakël.

I gjithë eventi do të transmetohet drejtpërdrejt (Live) për të gjithë adhuruesit e këtij sporti përmes kanalit zyrtar të FNC në YouTube.

KosovaPress