Koreja e Veriut do të mbështesë Rusinë derisa të arrijë fitoren në luftën në Ukrainë, tha ministrja e Jashtme e Koresë së Veriut Choe Son Hui në një bisedë me homologun rus Sergei Lavrov të premten.

"Marrëdhëniet tona tradicionale, historikisht miqësore, të cilat kanë kaluar testin e historisë, po ngrihen në një nivel të ri të marrëdhënieve të miqësisë së pathyeshme ushtarake," tha Son Hui, duke vlerësuar rolin e luajtur nga presidentët Kim Jong-un dhe Vladimir Putin në këtë përpjekje.

Ajo shtoi se Pheniani nuk ka dyshim se nën "udhëheqjen e mençur" të Putin, ushtria dhe populli rus "do të arrijnë një fitore të madhe në luftën e tyre të shenjtë për të mbrojtur të drejtat sovrane dhe interesat e sigurisë së shtetit".

"Dhe ne gjithashtu do të garantojmë se do të qëndrojmë fort pranë shokëve tanë rusë deri në fitore," tha Choe Son Hui.

Lavrov foli për "lidhje shumë të ngushta" midis ushtrive të dy vendeve, të cilat do t'u mundësojnë atyre të zgjidhin së bashku detyra të rëndësishme të sigurisë.

Asnjë prej tyre nuk përmendi deklaratat e SHBA-së, NATO-s, Koresë së Jugut dhe Ukrainës se Koreja e Veriut ka dërguar rreth 10.000 trupa në Rusi.

Sekretari i Shtetit amerikan, Antony Blinken tha se rreth 8 mijë prej tyre u dërguan në rajonin Kursk, i cili u pushtua nga forcat ukrainase në fillim të gushtit dhe se ata pritet që së shpejti t'i bashkohen luftës kundër Ukrainës.