Korea Veriore premton të konsolidojë përfundimisht statusin e vendit si fuqi bërthamore
Dëgjoje me zë...
Korea Veriore premton të konsolidojë përfundimisht statusin e vendit si fuqi bërthamore
Lideri i Koresë së Veriut, Kim Jong Un, ka premtuar të konsolidojë përfundimisht statusin e vendit si fuqi bërthamore dhe të mbajë qëndrim të ashpër ndaj Koresë së Jugut, të cilën e quajti “shteti më armiqësor”, raporton AP, përcjell KosovaPress.
Në fjalimin para parlamentit të Pjonjangut, ai akuzoi SHBA-në për “terrorizëm shtetëror dhe agresion global” dhe tha se Koreja e Veriut do të luajë një rol më aktiv kundër Uashingtonit, duke lënë të hapur opsionin e dialogut.
Ai u shpreh krenar për zgjerimin e shpejtë të armëve bërthamore dhe raketave, duke e quajtur të drejtë për të kundërshtuar kërcënimet dhe përpjekjet hegjemone të “imperialistëve gangsterë”.
Kim po pezullon dialogun me SHBA dhe Seul, duke i dhënë prioritet Rusisë në politikën e jashtme, por mund të ruajë opsione për të ardhmen për lehtësim sanksionesh dhe njohje të heshtur si fuqi bërthamore. Ndërkohë, media shtetërore njoftoi vizitën e mundshme të presidentit bjellorus Alexander Lukashenko në ftesë të Kim.
