Shorti i çerekfinaleve të Champions League ka rezervuar një përballje titanësh mes Bayern Munich dhe Real Madrid, një sfidë që po cilësohet si më emocionuesja e këtij raundi.

Sipas raportimeve nga Footy Africa, trajneri i bavarezëve, Vincent Kompany, ka ndarë mendimet e tij të para për këtë supersfidë gjatë mbrëmjes së të mërkurës.

Edhe pse e pranon forcën e kundërshtarit, belgu ka qenë i qartë në synimet e tij: "Real Madridi është skuadra më e mirë në historinë e Champions League, kështu që kjo do të jetë një sfidë fantastike për ne. Ne duam të fitojmë," është shprehur ish-mbrojtësi i njohur gjatë konferencës për shtyp.

Trajneri i Bayernit ka refuzuar të emërojë një favorit për këtë takim, duke theksuar se të dyja skuadrat gëzojnë cilësi të jashtëzakonshme dhe se vlerësimi për fituesin u takon mediave dhe tifozëve. "Favoriti? Nuk dua ta vendos këtë tani. Kjo është detyra juaj. Shpresoj që t'u dhurojmë një shfaqje të shkëlqyer tifozëve në këto dy ndeshje të nivelit të lartë," shtoi Kompany.

Ky ballafaqim pritet të jetë testi i vërtetë për projektin e tij te Bayerni, duke u përballur me "mbretërit" e Evropës në një rrugëtim që synon trofeun e madh.

KosovaPress