Prokuroria Themelore në Gjakovë, Departamenti për Krime të Rënda, ka njoftuar se me vendim të Prokurorit të Shtetit janë ndaluar për 48 orë katër persona me inicialet M.K., V.K., Z.Z. dhe M.K., nën dyshimin për kryerjen e veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.

Sipas Prokurorisë, ndaj të dyshuarve janë zhvilluar hetime të zgjeruara, përfshirë edhe zbatimin e masave të veçanta hetimore. Me kërkesë të Prokurorisë Themelore në Gjakovë dhe urdhër të Gjykatës Themelore në Gjakovë, më 5 qershor 2026 janë realizuar bastisje në shtëpitë dhe objektet përcjellëse të disa personave të dyshuar në qytetin e Gjakovës.

Gjatë operacionit janë sekuestruar sasi të konsiderueshme të substancave narkotike dhe prova të tjera materiale. Sipas njoftimit, policia ka konfiskuar rreth 293.96 gram kokainë, 124 gram heroinë, 13 gram marihuanë dhe rreth 116 gram substancë të dyshuar narkotike të llojit ende të paidentifikuar.

Po ashtu, gjatë bastisjeve janë gjetur dhe sekuestruar një armë zjarri e shkurtër me dy fishekë, një pushkë ajrore pa numër serik, 90 fishekë të kalibrave të ndryshëm, si dhe para të gatshme në vlerë prej 6,536.76 euro, 474 dollarë amerikanë dhe 60 franga zvicerane.

Në mesin e provave të sekuestruara janë edhe pesë telefona mobilë të llojeve të ndryshme, të cilët pritet t’i nënshtrohen ekzaminimeve të mëtejshme.

Prokuroria ka bërë të ditur se brenda afatit ligjor do t’i paraqesë Gjykatës kompetente kërkesën për caktimin e masës së paraburgimit ndaj katër të dyshuarve.

Autoritetet kanë theksuar se mbeten të përkushtuara në luftimin e veprave penale që lidhen me narkotikët, mbrojtjen e shëndetit publik dhe sjelljen para drejtësisë të personave të përfshirë në aktivitete të kundërligjshme.

/Kosovapress/