Ende nuk ka datë për Kuvendin “anti-Abdixhik” të LDK-së, ky emër pëlqehet për kryetar
Zgjedhjet 2026
Lexohet për: 3 min.
Dëgjoje me zë...
Ende nuk ka datë për Kuvendin “anti-Abdixhik” të LDK-së, ky emër pëlqehet për kryetar
23/07/2026 - 15:48
Linku u kopjua
E ardhmja e udhëheqësit të Lidhjes Demokratike të Kosovës pritet të përcaktohet në Kuvendin e jashtëzakonshëm të partisë, por deri tani nuk është bërë publike data e këtij zhvillimi të rëndësishëm për këtë subjekt dhe jo vetëm. Pas nismës së delegatëve për thirrjen e Kuvendit dhe dorëzimit të nënshkrimeve të nevojshme, brenda LDK-së po “ziejnë” zërat drejtimin e ardhshëm të saj.
KosovaPress ka tentuar të marrë një përgjigje nga strukturat drejtuese të LDK-së për të kuptuar se kur pritet të thirret Kuvendi i Jashtëzakonshëm dhe cilat janë hapat e radhës, por asnjëri prej të paktën 5 zyrtarëve të lartë të partisë nuk kanë kthyer përgjigje.
Por, ata që po kërkojnë një rishikim të mënyrës së udhëheqjes së LDK-së pas rezultatit të fundit zgjedhor më 7 qershor nuk po heshtin.
Delegatja e Kuvendit të Lidhjes Demokratike, Shqipe Pantina, thotë për KosovaPress se partia ka nevojë për ndryshim të lidershipit dhe të qasjes politike, me qëllim që të rikthehet si subjekt fitues në nivel vendi.
Ajo ka vlerësuar se thirrja e Kuvendit të Jashtëzakonshëm është pasojë e mungesës së reflektimit pas zgjedhjeve të 7 qershorit dhe mosmarrjes së përgjegjësisë për rezultatin e këtyre votimeve nga kryetari aktual, Lumir Abdixhiku.
Në anën tjetër, ish-kandidati nga diaspora për deputet nga LDK-ja, Niq Krasniqi, thekson se mbledhja e nënshkrimeve nga delegatët e bën të pashmangshme mbajtjen e Kuvendit, duke u bazuar në Statutin e partisë.
Ai ka kërkuar që procesi të zhvillohet me bashkëpunim mes strukturave të partisë, duke theksuar se mbledhia e madhe duhet të sjellë një epilog për udhëheqjen e partisë, qoftë përmes rikonfirmimit të Lumir Abdixhikut, ose zgjedhjes së një kryetari të ri.
Ata që nuk po e duan më Abdixhkun në krye të partisë janë duke propozuar emra tjerë për këtë pozitë. Shqipe Pantina ka përmendur nënkryetarin Lutfi Hazirit si një figurë që, sipas saj, mund ta udhëheqë LDK-në në periudhën aktuale dhe të bashkojë strukturat e fragmentuara të partisë.
Kërkesa për votëbesim ndaj kryetarit të LDK-së, Lumir Abdixhiku, është iniciuar pas pakënaqësive të shfaqura brenda partisë lidhur me rezultatin e dobët të subjektit në zgjedhjet e 7 qershorit.
