Vendimi i Komisionit të Arbitrazhit Sport (KAS) në favor të klubit të futbollit Prishtina e cila kishte bërë ankesë kundër Federatës së Futbollit të Kosovës (FFK) pasi kjo e fundit nuk e kishte licencuar si klub dhe si pasojë Prishtinës iu mohua e drejta për të marrë pjesë në garat dnërkombëtare.

Vendimi i KAS-it u kontestua menjëherë nga Federata e Futbollit të Kosovës e cila ndër të tjera e quajti vendim të pabazuar në ligj dhe se nuk është nënshkruar nga të gjithë anëtarët e KAS-it. Më tutje, FFK ka bërë të ditur se për këtë rast do ta njoftojë edhe  Gjykatën e Arbitrazhit Sportiv (CAS) në Lozanë.

Por jo vetëm kaq, FFK gjithashtu ka paralajmëruar se do ta shqyrtojë seriozisht mundësinë e largimit nga KOK-u me arsyetimin se ky institucion po lejon të merren vendime të njëanshme.

Ndaj këtyre pretendimeve, ka reaguar Komiteti Olimpik i Kosovës duke thënë se KAS-i nuk është institucion i tyre, por është i pavarur.

Ja reagimi i plotë i KOK-ut:

Komiteti Olimpik i Kosovës (KOK) dëshiron të sqarojë opinionin dhe komunitetin sportiv lidhur me deklaratën e Federatës së Futbollit të Kosovës (FFK) ndaj vendimit të fundit të Këshillit të Arbitrazhit Sportiv (KAS), që i dha të drejtë padisë së FC Prishtina.

KAS është një organ i pavarur, i cili zgjidhet nga Asambleja e Përgjithshme e KOK-ut dhe funksionon në përputhje me legjislacionin sportiv dhe standardet ndërkombëtare të drejtësisë sportive. Anëtarët që e përbëjnë KAS-in zgjidhen po ashtu nga Asambleja e KOK-ut për ciklin olimpik 2021-2025 dhe pikërisht z. Eroll Salihu, si kryetar i KAS-it, është propozuar nga FFK-ja për anëtar, sikurse anëtarët tjerë nga federatat tjera.

KAS-i nuk është i KOK-ut, siç pretendon FFK-ja dhe nuk i raporton KOK-ut, siç nuk i ka raportuar as në vendimin e fundit ndaj FFK-së, e as vendimeve paraprake ndaj federatave tjera. Pra, KOK nuk ndërhyn në proceset vendimmarrëse të KAS-it dhe nuk ndikon në vendimet e tij, duke respektuar në tërësi autonominë e këtij institucioni.

Në strukturën e sportit të Kosovës, çdo institucion ka përgjegjësi të qarta dhe të ndara. KOK-u është institucioni ombrellë që përfaqëson sportin e Kosovës në arenën ndërkombëtare dhe mbështet zhvillimin e federatave sportive pa ndërhyrë në punët e brendshme të tyre. Ndërkohë, KAS-i vepron si një organ arbitrazhi i pavarur që adreson konfliktet e ndryshme në fushën sportive dhe vepron në përputhje me standardet ligjore për të garantuar drejtësi për të gjitha palët.

KOK vlerëson lart kontributin e FFK-së dhe çdo federate tjetër për punën dhe përkushtimin në masivizimin e sportit dhe sukseseve ndërkombëtare, por kërcënimet dhe presionet për shqyrtim të anëtarësisë në KOK, për shkak të një vendimi të KAS-it, janë të papranueshme dhe të cilat tentojnë të ndikojnë në rolin e KAS-it dhe pavarësinë e tij. KAS funksionon në mënyrë të pavarur nga çdo institucion tjetër dhe mbetet i përkushtuar në zbatimin e drejtësisë sportive, pa u ndikuar nga anëtarësimi apo pozita e një organizate sportive brenda KOK-ut.

KOK-u është i përkushtuar të sigurojë që çdo organ i krijuar për zgjidhjen e çështjeve sportive të funksionojë në përputhje me parimet e drejtësisë dhe paanshmërisë. Në këtë kontekst, KOK-u i bën thirrje të gjitha federatave, përfshirë FFK-në, që të respektojnë parimet e drejtësisë sportive dhe të shmangin çdo lloj presioni që mund të cenojë pavarësinë e KAS-it. KOK fton të gjitha organizatat sportive të bashkëpunojnë për një klimë sportive të drejtë dhe të ndershme. Çdo ndërhyrje ose presion mbi KAS-in dëmton jo vetëm integritetin e këtij organi të pavarur, por edhe frymën e bashkëpunimit ndërinstitucional në sportin tonë.