Klubi amerikan Inter Miami CF ka bërë një tjetër hap simbolik në nder të kapitenit të tij, Lionel Messi, duke prezantuar zyrtarisht tribunën “Leo Messi Stand” në stadiumin e ri të skuadrës.

Tribuna do të jetë pjesë e stadiumit modern “Nu Stadium”, i cili do të inaugurohet më katër prill 2026 dhe do të ketë një kapacitet prej rreth 26,700 spektatorësh.

Sipas klubit, kjo tribunë është një mënyrë për të vlerësuar ndikimin e jashtëzakonshëm që Messi ka pasur që nga ardhja e tij në vitin 2023. Argjentinasi jo vetëm që ka ngritur nivelin sportiv të ekipit, por ka ndikuar fuqishëm edhe në rritjen e popullaritetit të klubit dhe të ligës MLS në nivel global.

“Messi mbërriti fillimisht në Floridën Jugore në verën e vitit 2023, duke nisur një epokë suksesi për Klubin. Ai ishte çelësi në drejtimin e Inter Miamit drejt katër trofeve të parë historikë, duke fituar Kupën e Ligës 2023, Mburoja e Mbështetësve të MLS 2024, titullin e Konferencës Lindore 2025 dhe Kupën MLS 2025” – shkroi klubi Inter Miami CF.

Ndërkohë “Leo Messi Stand” do të përfshijë disa sektorë të tribunave të poshtme dhe të sipërme të stadiumit, duke u bërë një nga elementët kryesorë identifikues të arenës së re të Inter Miami.

Messi qëndron si lideri i klubit në karrierë për gola dhe asiste, duke regjistruar 82 gola dhe 53 asiste në 94 paraqitje në të gjitha garat.

KosovaPress