Në kuadër të aktiviteteve të parapara me kalendarin zyrtar për vitin 2026, Klubi i Boksit “AP Peja” organizoi sot më 21 mars, turneun tradicional të boksit “Epopeja e Dukagjinit”, një aktivitet që promovon sportin dhe talentet e reja në Kosovë.

Evenimenti nisi me homazhe në Kompleksin e Varrezave në Gllogjan nga ora 11:00 deri në 12:00, ndërsa turneu filloi në ora 13:00. Turneu ishte i hapur për të gjitha grupmoshat dhe ofroi 14 duele shumë interesante, ku boksierë nga klube të ndryshme të Kosovës u përballën në ring, duke krijuar një atmosferë sportive dhe emocionuese.

Pas përfundimit të dueleve, juria shpalli më të dalluarit e turneut:

Boksieri më i mirë: Riad Alimusaj - K.B. “AP Peja”

Tekniku më i mirë: Jonuz Kastrati - K.B. “Gjakova 137”

Çifti më luftarak: Lindon Shala - K.B. “Besa” Pejë dhe Erdi Aliu – K.B. “Dardanët” Prishtinë

Boksieri më perspektiv: Lendri Gashi - K.B. “Fushë Kosova”

Gjatë aktivitetit u ndanë mirënjohje dhe medalje për boksierët, për klubet pjesëmarrëse, për Komunën e Pejës dhe për personalitete të shquara që kanë dhënë kontribut të rëndësishëm në sport.

Turneu “Epopeja e Dukagjinit” vazhdon të jetë një ngjarje e rëndësishme për promovimin e boksit dhe zhvillimin e sportistëve të rinj në Kosovë.

/Kosovapress/