Gjykata Themelore në Ferizaj ka caktuar masën e paraburgimit prej një muaji ndaj të pandehurve B.B. dhe E.K., nën dyshimin për kryerjen e veprës penale “Pranimi i ryshfetit në sektorin privat”, të Kodit Penal të Republikës së Kosovës.

Vendimi është marrë pas kërkesës së Prokuroria Themelore e Ferizajt dhe mbajtjes së seancës dëgjimore, ku gjyqtari i procedurës paraprake, Dardan Maloku, ka vlerësuar se ekziston dyshimi i bazuar për veprën penale.

Sipas gjykatës, më 25 shkurt 2026 në Ferizaj, në kuadër të KEDS, i pandehuri B.B., në cilësinë e koordinatorit të njësisë së kontrollit në Departamentin për humbje të energjisë elektrike, dhe i pandehuri E.K., si ushtrues detyre i koordinatorit për lidhje të reja, dyshohet se i kanë kërkuar 400 euro të dëmtuarit A.H.

Sipas dyshimeve, ata i kanë premtuar vendosjen e njësorit elektrik brenda një jave në lokalin e tij, ndërsa në të kundërtën i është thënë se do të duhej të priste pesë deri në gjashtë muaj. Po ashtu, dyshohet se shuma e kërkuar do të ndahej ndërmjet katër personave.

Pas zbatimit të masave të veçanta hetimore, të dyshuarit janë kapur dhe arrestuar në flagrancë nga Policia e Kosovës.

Gjykata ka aprovuar kërkesën e prokurorit për paraburgim, duke caktuar masën prej një muaji ndaj të pandehurve. Palët janë njoftuar se ankesa ndaj këtij aktvendimi nuk e shtyn ekzekutimin e tij.

/Kosovapress/