Evropa do të konsultohet, por përfundimisht do të përjashtohet nga bisedimet e planifikuara të paqes midis Rusisë, SHBA-së dhe Ukrainës, ka zbuluar i dërguari special i Donald Trump për Ukrainën.

Kur u pyet nëse Evropa do të merrte pjesë në negociatat e planifikuara, Keith Kellogg tha se ai vjen nga "shkolla e realizmit dhe kjo nuk do të ndodhë".

“Mund të tingëllojë plot siklet, sikur shkumësi në një dërrasë të zezë, por unë po ju them diçka që është vërtet e sinqertë. Dhe miqve të mi evropianë do t’u thosha: bashkohuni në diskutim, jo ​​duke u ankuar nëse do të jeni apo jo në tavolinë, por duke dalë me propozime, ide konkrete dhe një rritje të shpenzimeve për mbrojtjen”, tha ai.

Kellogg deklaroi se një nga arsyet e dështimit të negociatave të mëparshme të paqes midis Ukrainës dhe Rusisë ishte pjesëmarrja e shumë vendeve që nuk kishin kapacitet për të kryer një proces të tillë.

"Ne nuk do të shkojmë në atë rrugë," tha ai në margjinat e Konferencës së Sigurisë në Munih.

Presidenti ukrainas Volodymyr Zelensky paralajmëroi më herët në fjalimin e tij në konferencë se Evropa mund të përjashtohet nga negociatat. Ai i bëri thirrje Evropës të ndërmarrë hapa dhe të formojë një ushtri evropiane në të cilën Ukraina do të luante një rol qendror.

Kryeministri hungarez Viktor Orban dje u bëri jehonë pikëpamjeve të Kremlinit, duke paralajmëruar se situata në Ukrainë mund të bëhet një Afganistan evropian.

Ai në një ngjarje mediatike në Dubai theksoi se nëse presidenti Trump nuk gjen një zgjidhje, lufta mund të shndërrohet në një Afganistan për Bashkimin Evropian, duke aluduar në luftën 20-vjeçare të SHBA-së në Afganistan.

Lufta në Afganistan, e cila filloi në vitin 2001 menjëherë pas sulmeve të 11 shtatorit dhe përfundoi në vitin 2021 me tërheqjen e papritur të trupave amerikane, mbetet lufta më e gjatë amerikane në histori.

Orban i bëri deklaratat e tij të fundit në një kohë kur presidenti amerikan Donald Trump, me të cilin ai gjithashtu ka marrëdhënie të ngushta, po fillon një përpjekje të re, të diskutueshme për të negociuar fundin e pushtimit rus.

Telefonata gati 90-minutëshe e Trump me Vladimir Putin tri ditë më parë shkaktoi tronditje në Kiev dhe kryeqytetet evropiane, duke nxitur frikën se Uashingtoni dhe Moska synojnë të vendosin vetë për të ardhmen e Ukrainës.