Forcat izraelite kanë ndërhyrë ndaj një anijeje me ndihma për Gazën, duke ndaluar të paktën 22 anije në ujëra ndërkombëtare pranë ishullit grek të Kretës, sipas organizatorëve pro-palestinezë.

Organizatorët e Global Sumud Flotilla e kanë cilësuar veprimin si “pirateri”, duke pretenduar se anijet janë ndaluar rreth 965 kilometra larg Gazës dhe se personat në bord janë marrë në mënyrë të paligjshme.

Ministria e Jashtme e Izraelit tha se rreth 175 aktivistë nga më shumë se 20 anije janë ndaluar dhe po transportohen drejt Izraelit, duke e quajtur flotiljen një “truk PR”, raporton BBC, përcjell KosovaPress.

Sipas të dhënave të flotiljes, pjesa tjetër e anijeve po vazhdon lundrimin pranë brigjeve jugperëndimore të Kretës.

Flotilja me gjithsej 58 anije ishte nisur nga Spanja, Franca dhe Italia rreth dy javë më parë, me qëllim thyerjen e bllokadës detare të Izraelit ndaj Gazës.

/Kosovapress/