Kryeministri i Izraelit Benjamin Netanyahu tha se nuk do të bëjë kompromis për mbajtjen e trupave në korridorin Filadelfi në kufirin midis Rripit të Gazës dhe Egjiptit, raporton sot e përditshmja izraelite Haaretz.

Netanyahu iu përgjigj vërejtjeve të ministrit të Mbrojtjes Yoav Gallant në mbledhjen e kabinetit, duke thënë: "Unë dua të liroj pengjet tanë po aq sa ju".

Më herët, ministri Gallant bëri thirrje për mbledhjen e menjëhershme të Kabinetit të Sigurisë për të anuluar vendimin e tij për të mbajtur forcat në korridorin e Filadelfit.

"Kabineti i Sigurisë duhet të mblidhet menjëherë dhe të ndryshojë vendimin e marrë të enjten," shkroi Gallant në X.

Duke iu përgjigjur kërkesës, Netanyahu tha: "Edhe pas vrasjes së pengjeve, ne nuk do të bëjmë kompromis në korridorin e Filadelfit. Vendimi që morëm në mbledhjen e fundit të kabinetit ishte i drejtë. Ta anulojmë tani? Pas vrasjes së tmerrshme të pengjeve tona?"

Kjo erdhi disa orë pasi ushtria izraelite tha se kishte gjetur trupat e gjashtë pengjeve nga Rripi jugor i Gazës.

Haaretz, duke cituar një burim izraelit, tha se tre nga gjashtë pengjet supozohej të liroheshin në fazën e parë të marrëveshjes së shkëmbimit të të burgosurve që po negociohet aktualisht.


"Ata u shfaqën në listat e dhëna në fillim të korrikut. Ishte e mundur të ktheheshin të gjallë", tha burimi.

Hamasi tha se gjashtë pengjet u vranë si rezultat i sulmeve ajrore të vazhdueshme izraelite në Rripin e Gazës.


Izraeli vlerëson se mbi 100 pengje mbeten të mbajtura nga Hamasi në Gaza, disa prej të cilëve besohet se janë vrarë tashmë.

Të enjten, Kabineti i Sigurisë miratoi praninë e vazhdueshme të ushtrisë në Korridorin e Filadelfit si pjesë e çdo marrëveshjeje të propozuar për shkëmbimin e pengjeve dhe armëpushimin. Me këtë vendim, kabineti miratoi zyrtarisht qëndrimin e kryeministrit Netanyahu në lidhje me korridorin e Filadelfit.

Për muaj të tërë, SHBA, Katari dhe Egjipti janë përpjekur të arrijnë një marrëveshje midis Izraelit dhe Hamasit për të siguruar një shkëmbim të burgosurish dhe një armëpushim, dhe për të lejuar hyrjen e ndihmave humanitare në Gaza. Por përpjekjet e ndërmjetësimit kanë ngecur për shkak të refuzimit të Netanyahut për të përmbushur kërkesat e Hamasit për të ndaluar luftën. /AA