Irani rezervon të drejtën për t'iu përgjigjur "agresionit kriminal" të Izraelit, tha ministri i Jashtëm Abbas Araqchi në një letër drejtuar sekretarit të përgjithshëm të Kombeve të Bashkuara Antonio Guterres, në të cilën ai kërkon një takim urgjent të Këshillit të Sigurimit, njoftoi Ministria e Punëve të Jashtme iraniane sot.

Ndërkohë, kryeministri izraelit Benjamin Netanyahu tha se sulmi ndaj Iranit ishte "i saktë dhe i fuqishëm" dhe "i arriti të gjitha objektivat e tij". Ai shtoi se Izraeli është në një luftë ekzistenciale kundër "boshtit të së keqes" të udhëhequr nga Irani dhe vuri në dukje se armiqtë e Izraelit duhet të paguajnë një "çmim shumë të lartë".

Netanyahu iu drejtua drejtpërdrejt popullit iranian: "Lufta jonë nuk është e drejtuar kundër jush, por kundër regjimit tiranik që ju shtyp dhe kërcënon të gjithë rajonin".

Ministri izraelit i Mbrojtjes Yoav Gallant informoi homologun e tij amerikan Lloyd Austin për sulmin izraelit ndaj Iranit, të cilin ai e përshkroi në një deklaratë për shtyp si "të suksesshëm". Në një deklaratë, zyra e Gallant tha se të dy folën për sulme "precize" mbi "objektet e prodhimit të raketave, raketat tokë-ajër dhe aftësitë ajrore iraniane".

Ministri izraelit falënderoi Austin për "mbështetjen e palëkundur" të SHBA për mbrojtjen e Izraelit kundër "agresionit iranian".

Ata gjithashtu "diskutuan mundësitë strategjike që janë shfaqur si rezultat i arritjeve operacionale, si në zonat veriore ashtu edhe ato jugore", thuhet në deklaratë.