Inspektorati Policor i Kosovës ka nisur hetime për shkeljet e dyshuara në konkursin për gradimin e zyrtarëve të policisë në gradën e rreshterit, testimi me shkrim i të cilit u mbajt më 4 maj 2024.

Në një komunikatë thuhet se Inspektorati Policor i Kosovës ka nisur hetimet pas pranimit të ankesave dhe informacioneve nga burime të ndryshme sipas të cilave thuhet se ka pasur shkelje të ndryshme gjatë procesit.

Hetuesit e IPK-së fillimisht kanë analizuar dhe verifikuar informacionet fillestare për parregullsi, pas së cilës kryeshefi Kushtrim Hodaj ka marrë vendim për formimin e ekipit të përbashkët inspektues-hetues për të hetuar dhe inspektuar procesin e gradimit nga momenti i shpalljes deri në fazën aktuale. IPK paralajmëron se varësisht nga të gjeturat do të ndërmerren veprimet e nevojshme ligjore.