Inflacioni në Bashkimin Evropian dhe në Eurozonë u ngadalësua me bazë vjetore në nëntor, por norma është ende dyshifrore - ishte 11.1 për qind në nivel të BE-së dhe 10.1 për qind në Eurozonë, sipas të dhënave të Eurostat.
Norma vjetore e inflacionit në BE, e matur me indeksin e harmonizuar të çmimeve të konsumit (IHÇK), ishte 11.1% në nëntor, pasi arriti në 11.5% në tetor, sipas raportit të Eurostat.Ngadalësimi i inflacionit në nëntor në eurozonë reflekton ngadalësimin e rritjes së çmimeve të energjisë, të cilat në nëntor ishin 34.9 për qind më të larta se në të njëjtin muaj të vitit të kaluar. Gjegjësisht, në muajin tetor, në nivel vjetor çmimet e energjisë janë rritur për 41.5 për qind.
Çmimet e ushqimeve, pijeve dhe duhanit janë rritur për 13.6 për qind krahasuar me nëntorin e vitit të kaluar, ndërsa në tetor të këtij viti janë rritur për 13.1 për qind.
Krahasuar me muajin tetor, norma vjetore e inflacionit është ulur në 16 vende anëtare të BE-së dhe është rritur në tetë vende, përfshirë Kroacinë. Në tri vende, ajo mbeti në nivelin e tetorit.
Hungaria pati normën më të lartë vjetore të inflacionit në nëntor, 23.1%. Pas saj vjen Letonia me inflacion prej 21.7 për qind dhe fqinjët baltik Estonia dhe Lituania, ku norma e inflacionit ishte 21.4 për qind.
Italia, ekonomia e tretë më e madhe dhe një partner i rëndësishëm tregtar i Kroacisë, ishte më afër Kroacisë për sa i përket normës së inflacionit në muajin nëntor, ku norma e inflacionit mbeti në nivelin 12.6 për qind, si një muaj më parë.
Në Gjermani, ekonomia më e madhe evropiane dhe gjithashtu një partner i rëndësishëm tregtar i Kroacisë, ajo arriti në 11.3 për qind dhe ishte 0.3 pikë përqindje më e ulët se një muaj më parë.
