Presidenti i Partisë së Lirisë, Ilir Meta, në një reagim të gjatë në rrjetet sociale ka deklaruar se në gjyqin e mbajtur herën e fundit ndaj tij në GJKKO, prokurorët ‘kanë imagjinuar mesazhe me 200 mijë euro”.

Meta i referohet mesazheve të lexuara nga prokurori i çështjes në seancën e fundit, ku u lexua nga dosja mesazhi që Meta i kishte shkruar Kastriot Ismailit se i duheshin 200 mijë”.

Por Meta thotë se nuk ka pasur asnjë fjali ku të cilësoheshin nëse ishin para, postera apo diçka tjetër.

“’Eurot’ ekzistojnë vetëm në dëshirën dhe imagjinatën e prokurorëve, siç kemi provuar edhe gjatë gjykimit në seancën paraprake.

Është e qartë se edhe në fabrikimin e një “sms” të tillë të pretenduar, nuk ka as euro, as dollarë, as lekë dhe as fletëpalosje, apo postera, meqënëse mesazhi i pretenduar koinçidon me Qershorin 2009 para zgjedhjeve parlamentare kur unë kam qenë thjesht një deputet opozitar dhe pa asnjë funksion qeveritar.

Po kështu, çuditërisht nga pala marrëse e kësaj “sms” nuk ka asnjë përgjigje apo reagim (!!!)

Ndërkohë që nuk ka asnjë garanci se kjo “sms” është dërguar nga unë”, shprehet Meta.

“Por ishte shumë e rëndë gjatë seancës paraprake kur prokurori pasi shpiku eurot te “prova”, që ne se kemi, e interpretuan si shpërblim për lidhjen e marrëveshjes CEZ-DIA.

Ndërkohë që DIA është regjistruar në Shqipëri 14 muaj pas kësaj “sms”-je të fabrikuar, ndërsa marrëveshjen me CEZ-in e ka lidhur 15 muaj pas kësaj “sms”, ndërsa pagesat e para nga CEZ-I i ka marrë 17 muaj pas kësaj “sms”.

Kjo lloj “sms” është bërë lajm që para 15 vitesh dhe e kanë marrë seriozisht vetëm ata që u ka “pëlqyer” për lojë politike.

Ndoshta prokurorët më ngatërrojnë me Edi Ramën që shpall me firmën e tij fituese kompani që lindin vetëm 8 muaj më pas dhe dëmtojnë rëndë financat publike. Sepse u lidh marrëveshja CEZ-DIA herën e parë në 1 shtator 2010, por edhe pse u lidh marrëveshja e 2 shkurt 2011, e ka shpjeguar shumë qartë krahu i djathtë i Z. Kastriot Ismailaj në drejtimin e DIA-s, por edhe si shef i negociatave të DIA-s me CEZ-in, Z. Elvis Mataj në 2 emailet e tij, në 9 dh 16 prill 2014 drejtuar avokatit të Z. Ismailaj në Vjenë”, shkruan më tej Meta.

“Unë do të insistoj pa rreshtur për të garantuar këtë transparencë. Nëse drejtësia kërkon t’i fshihet publikut dhe transparencës, kjo i thotë të gjitha”, thotë Meta.

/Kosovapress/