Kryetari i Nderit i Aleancës për Ardhmërinë e Kosovës (AAK), Ramush Haradinaj, ka falënderuar qytetarët në Kosovë dhe diasporë për besimin e dhënë në zgjedhje, duke vlerësuar se mbështetja e tyre përfaqëson angazhim për vazhdimin e rrugës drejt një Kosove të zhvilluar, sovrane dhe demokratike.

Përmes një mesazhi publik, Haradinaj tha se është mirënjohës për çdo angazhim dhe përkrahje të votuesve që, sipas tij, i besuan vizionit të Aleancës për siguri, zhvillim dhe një drejtim të ri politik.

“Vota juaj këtë herë ishte më shumë sesa mbështetje për Aleancën. Ju na dhatë krahë që të vazhdojmë betejën e nisur për Kosovën që duam, të zhvilluar, sovrane e të pandashme, demokratike nga brenda dhe në partneritet të përjetshëm me aleatët, posaçërisht me Shtetet e Bashkuara”, shkruan Haradinaj.

Ai ka theksuar se e kupton lodhjen e qytetarëve nga proceset e përsëritura zgjedhore, duke shtuar se vota e marrë këtë herë ka “vlerë të shumëfishtë”, si shprehje e besimit për punën e deritanishme dhe synimet e ardhshme të subjektit politik.

Haradinaj ka vlerësuar gjithashtu listën zgjedhore të Aleancës, duke përmendur se kësaj radhe asaj i priu Ardian Gjini.

Sipas tij, pas përfundimit të garës elektorale, Aleanca mbetet e përkushtuar për t’u përballur me sfidat që e presin vendin dhe për të vepruar në interes të shtetit dhe kombit.

Në fund, ai uroi qytetarët dhe institucionet e përfshira në organizimin e procesit zgjedhor, duke shprehur besimin se zgjedhjet kanë qenë të lira, të ndershme dhe demokratike.

/Kosovapress/