Kryetari i Aleancës për Ardhmërinë e Kosovës (AAK), Ramush Haradinaj ka reaguar lidhur me vizitën e shefit të Agjencisë Qendrore amerikane të Inteligjencës (CIA), William Burns në Kosovë.

Ramush Haradinaj përmes një postimi në profilin e tij në rrjetin social Facebook, ka shkruar se vizita e Burns në Kosovë është nder i madh dhe lajm i mirë për sigurinë e vendit.

“Vizita e drejtorit të Agjencisë Qendrore të Inteligjencës z. Burns në Kosovë, është nder i madh për Kosovën dhe lajm i mirë për sigurinë tonë. Për ne, është jetike integrimi në familjen euroatlantike, dhe aleanca me Amerikën është e përjetshme”, ka shkruar Haradinaj.

Haradinaj, ka thënë se po ashtu lajm i mirë është edhe takimi i tij me udhëheqësit e institucioneve, duke shtuar se askush nuk mund ta rrezikojë aleancën e Kosovës me Amerikën.

“Institucionet e Kosovës duhet të qëndrojnë të palëkundura për aleancën me Amerikën. Takimet e drejtorit z. Burns me udhëheqësit e institucioneve, janë lajm i mirë për Kosovën. Sa i përket Kurtit dhe agjendës së tij, ia lëmë kohës ta dëshmojë, por askush nuk mund ta rrezikojë aleancën e Kosovës me Amerikën. Ajo është e përjetshme dhe jetike”, ka shkruar ndër të tjera Haradinaj.

Shefi i CIA-s, William Burns të enjten është takuar me presidenten e vendit, Vjosa Osmani.

Ndërsa, sot Burns është parë edhe në objektin e Qeverisë së Kosovës.

https://kosovapress.com/osmani-nje-dite-pas-takimit-me-shefin-e-cia-se-aleanca-me-shba-ne-garance-per-siguri

https://kosovapress.com/shefi-i-cia-s-shkon-ne-qeveri-per-takim-me-kurtin

https://kosovapress.com/shefi-i-cia-s-largohet-nga-objekti-i-qeverise