Kryetari i Aleancës për Ardhmërinë e Kosovës, Ramush Haradinaj kujtoi sot vëllezërit Bytyçi, në përvjetorin e vrasjes së tyre.

Ai potencoi se shteti serb, përpos që i ka ekzekutuar vëllezërit Agron, Yll dhe Mehmet Bytyçi dhe shumë shqiptarë tjerë, vazhdon me injorimin dhe mohimin e krimeve “dhe me dekorimin e kriminelëve të luftës, mes tyre edhe ata që dyshohen se vranë vëllezërit Bytyqi”.

Ai theksoi se heroizmi, humanizmi e atdhedashuria e vëllezërve Bytyçi do të kujtohen ndër breza.

“Agron, Yll dhe Mehmet Bytyqi, shtetas amerikanë, iu bashkuan rreshtit të Ushtrisë Çlirimtare të Kosovës në përpjekjet më vendimtare për lirinë e atdheut. Vetëm pak ditë pas përfundimit të luftës u arrestuan nga shteti serb, ku më pas u ekzekutuan. Shteti serb, përpos që i ekzekutoi ata dhe shumë shqiptarë tjerë, vazhdon me injorimin dhe mohimin e krimeve dhe me dekorimin e kriminelëve të luftës, mes tyre edhe ata që dyshohen se vranë vëllezërit Bytyqi. Sot e çdo ditë ndajmë dhembjen me familjen Bytyqi - me bacën Ahmet e me zonjën Bahrije dhe bashkëluftëtarët e “Atlantikut.”.", shkroi Haradinaj në Facebook.

Ai shtoi se nuk do të ndalen në përpjekjet për të çuar drejtësinë në vend për krimin e dëshmuar dhe vrasësit ta marrin dënimin e merituar.

Tre vëllezërit Bytyçi, kanë qenë pjesëtarë të Ushtrisë Çlirimtare të Kosovës, të batalionit Atlantiku, i cili ka qenë i përbërë nga shqiptarë që kanë jetuar në ShBA. Në korrik të vitit 1999, vëllezërit Bytyçi ishin arrestuar në rrethana të panjohura nga forcat serbe në Merdarë. Një gjykatë në Prokuples në Serbi i kishye dënuar me nga 15 ditë heqje lirie nën akuzat për siç ishte thënë, kalim të paligjshëm të kufirit të ish-Jugoslllavisë. Trupat e të tre vëllezërve Bytyçi ishin gjetur në një varrezë masive në Serbinë lindore.