Deputeti i Aleancës për Ardhmërinë e Kosovës, Ramush Haradinaj ka kritikuar ministren në detyrë të Mjedisit Fitore Pacolli për ndalimin e transportit të materialeve ndërtimore në Bjeshkët e Nemuna.

Përmes një postimi në Facebook ai e ka cilësuar këtë si një shkëputje totale të qeverisë nga realiteti i qytetarëve të Kosovës.

“Vendimi i ministres në detyrë, Fitore Pacolli, për të ndaluar transportin e materialeve ndërtimore në Bjeshkët e Nemuna, me arsyetimin e mbrojtjes së ekosistemit, është një shembull i qartë i një qasjeje të paditur dhe të shkëputur nga realiteti. Pa e njohur terrenin, pa e kuptuar jetën e njerëzve që jetojnë atje dhe pa ndjerë vështirësitë e tyre, po merren vendime që godasin drejtpërdrejt familjet, fshatrat dhe ekonominë lokale”, ka shkruar ai.

Ai shkruan se Rugova dhe Bjeshkët e Nemuna nuk janë thjesht një zonë natyrore në hartë, por janë zona të banuara me 13 fshatra, ku njerëzit jetojnë dhe përpiqen të zhvillojnë ekonominë e tyre në kushte të vështira infrastrukturore

Haradinaj e kritikon qeverinë duke thënë se në vend që kjo perlë turishtike të mbështetet me investime në rrugë, infrastrukturë dhe zhvillim të qëndrueshëm, po përballet me vendime që rrezikojnë ta izolojnë dhe ta mbysin çdo mundësi zhvillimi.

Më 4 mars, ministrja e Mjedisit, Fitore Pacolli bëri të ditur se ndalohet rreptësisht çdo lloj aktiviteti ndërtimor ilegal në Parqet Kombëtare.

“Ministrja Fitore Pacolli ka nxjerrë sot vendim që të ndalohet rreptësishtë çdo lloj aktiviteti ndërtimor ilegal brenda Parqeve Kombëtare “Bjeshkët e Nemuna” dhe “Sharri” në Kosovë. Me këtë vendim parashihet të ndalohet hyrja, transporti dhe qarkullimi i çdo mjeti që shërben për bartjen e materialeve ndërtimore, si dhe përdorimi i mjeteve të rënda të punës si eskavatorë, betonierë, buldozerë, kamionë vetëshkarkues dhe makineri të ngjajshme”, pati shkruar Ministria e Mjedisit.

Ministrja Pacolli shkroi se, “Ky është hapi ynë i parë në përpjekjen për të rikthyer ligjshmërinë dhe rendin në zonat e mbrojtura. Parqet tona kombëtare janë pasuri e përbashkët që duhet ruajtur secili nga ne”.

/Kosovapress/