Katalanasit ishin pranë fitores në terrenin mysafir duke avancuar dy herë ndaj  skuadrës Real Betis, por në minutat shtesë pësuan golin duke u kënaqur me vetëm një pikë, duke i ofruar kështu mundësinë rivalit Real Madrid të shkurtojë epërsinë në krye të tabelës.

Autor i golit të parë në stadiumin “Benito Villamarin” ishte reprezentuesi polak Robert Lewandowski, pas asistimit të Jules Kounde, në minutën e 41-të.

Vendësit barazuan përmes penalltisë së diskutueshme në minutën e 68-të. Pas protestës së ashpër, gjermani Hansi Flick u përjashtua nga ndeshja me karton të kuq, ndërsa realizues i pagabueshëm nga pika e bardhë ishte Giovani Lo Celso.

Barcelona erdhi në epërsi për herë të dytë me golin e Ferran Torres pas asistimit të Lamine Yamal tetë minuta para përfundimit të ndeshjes.

Real Betis nuk lejoi megjithatë të pësojë dhe barazoi shifrat me golin e Assane Diao pas asistimit të Aitor Ruibal, në minutën e katërt shtesë.

Të përzgjedhurit e Hansi Flick kanë 38 pikë në krye të tabelës, prej tyre 12 fitore, dy barazime dhe tri humbje. Katalanasit mund ta humbasin pozitën e liderit nëse Real Madrid (33 pikë) shënon fitore në dy takimet e mbetura.

Në ndeshjen tjetër të ditës së sotme, skuadra Las Palmas ishte më e mirë si vendës ndaj Real Valadolidit duke shënuar fitore me rezultatin 2:1.

Sonte zhvillohen duelet e tjera Valencia-Rayo Valecano dhe Girona Real Madrid.

Nesër në program janë takimet Leganes Real Sociedad, Athletic Club-Villarreal, Osasuna-Deportivo Alaves dhe Atletico-Sevilla.

Xhiroja e 17-të e La Ligës përmbyllet ditën e hënë me takimin ndërmjet Getafe dhe Espanyol.

• 

•