Deputetja e Lëvizjes Vetëvendosje, Rozeta Hajdari, ka kundërshtuar kërkesën e PDK-së për seancë të jashtëzakonshme lidhur me çmimet e energjisë elektrike, duke e cilësuar atë si të bazuar në një interpretim të thjeshtuar të situatës.

Gjatë seancës së thirrur nga Partia Demokratike e Kosovës (PDK), Hajdari tha se pretendimet për manipulim të faturimit dhe mosmatje të saktë nga njehsorët janë të ngritura si bazë për kërkesën, por sipas saj, realiteti është më kompleks

Ajo theksoi se çmimi i energjisë është rezultat i disa faktorëve.

“Çmimi i energjisë nuk është rezultat i një elementi të vetëm rezultati është një kombinim faktorësh që përfshin importin humbjet në rrjet dhe mekanizmat balancues të tarifave. Prandaj rritja e faturave nuk mund të reduktohet në një pretendim me  një manipulim teknik”, tha ajo.

Sipas saj, çështja duhet të trajtohet nga institucionet përkatëse.

“Dukuria duhet të hetohet dhe këtë po e bëjnë organet kompetente, ndërsa kërkesa e PDK-së tenton ta reduktojë një sistem kompleks në një narrativë të thjeshtë për manipulim të njehsorëve,” –  deklaroi Hajdari.

Ajo thotë se kërkesa e PDK-së tenton të reduktojë një sistem kompleks në një narrativë të thjeshtë për manipulim të njehsorëve, ndërkohë që kemi të bëjmë me një realitet më të ndërlikuar, ku faturimi varet nga faktorë të shumtë strukturorë dhe ku çdo problem duhet të trajtohet me prova dhe jo me deklarime politike të përgjithshme

Ajo bën thirrje që sa më shpejt Kuvendi i Republikës së Kosovës të miratojë projektligjin për energjinë dhe energjinë elektrike, në përputhje me direktivat e BE-së.

Kështu ajo në emër të Komisionit për Ekonomi, që të përshpejtojmë reformat për të cilat janë zotuar në kuadër të integrimit në rrjetin energjetik evropian dhe të mos fokusohen vetëm në çështje të ngushta si ajo e njehsorëve elektrikë.

/Kosovapress/