Drama në Mynih nuk u mbyll me fishkëllimën e fundit të Slavko Vincic. Përveç tensionit në fushë, një skenë e pazakontë ka ndodhur me yllin turk, Arda Guler, i cili pavarësisht dygolëshit të shënuar, e ka mbyllur natën në mënyrën më të keqe të mundshme.

Gjatë rrugës për në dhomat e zhveshjes, Guler nuk i ka përmbajtur nervat duke i bërtitur me rreptësi arbitrit slloven për vendimet e marra gjatë lojës. Ky reagim agresiv ka detyruar Vincic të nxjerrë kartonin e kuq drejtpërdrejt për talentin e Real Madridit, edhe pse ndeshja kishte përfunduar zyrtarisht.

Ky ndëshkim pas loje është një goditje e dyfishtë për "Los Blancos", të cilët përveç eliminimit, do të humbasin shërbimet e Guler për ndeshjen e parë të sezonit të ardhshëm në garat evropiane. Nervozizmi i tepërt pas eliminimit duket se ka mposhtur qetësinë e të riut turk, duke e lënë atë jashtë fushës në një moment mjaft të hidhur.

KosovaPress