Ish-mesfushori i Manchester United, Scott McTominay, është nderuar në mënyrë të jashtëzakonshme nga Banka e Skocisë, e cila ka lançuar një kartëmonedhë speciale prej 20 paund me imazhin e golit të tij ikonik (overhead kick) kundër Danimarkës.

Ky gol i çmendur në "Hampden Park" kishte siguruar fitoren dramatike 4-2 dhe kualifikimin e parë të Skocisë në një Botëror që nga viti 1998, duke u kthyer menjëherë në një moment krenarie kombëtare.

Përtej festës, ky projekt ka edhe një mision të rëndësishëm social, pasi të gjitha të ardhurat e mbledhura nga ky edicion do të dhurohen për Crisis, një organizatë bamirëse që lufton për të zhdukur dukurinë e të pastrehëve në vend.