Gliha: Lojtarët duhet të vdesin në fushë për Kosovën
Trajneri i Kombëtares së Kosovës, Primozh Gliha ka deklaruar se nën drejtimin e tij lojtarët duhet të japin maksimumin dhe të jenë të gatshëm të vdesin në fushë për kombëtaren.
Tekniku slloven ka shtuar gjithashtu në ndeshjet e mbetura të kualifikimeve për në Kampionatin Evropian do të shfrytëzohen për të ndryshuar mentalitetin krahasuar me ndeshjet e kaluara.
Sa i përket largimit të sulmuesit Arbnor Muja drejt Kombëtares së Shqipërisë, menaxheri i kombëtares, Bajram Shala deklaroinse FFK ka bërë gjithçka që ai të jetë pjesë e Kosovës, por ishte dëshira e lojtarit që të luajë për Shqipërinë.
Sa i përket ndeshjes me Zvicrën, Gliha ka deklaruar se është një sfidë shumë e komplikuar por që do të provohet të merret një rezultat pozitiv. Ai ka shtuar se kjo ndeshje mund të shërbejë për ta kthyer entuziazmin në kombëtare.
Ai pranoi se sa i përket kualifikimeve, tashmë situata është shumë e komplikuar, por që “duhet siguruar që secili nga ne dhe lojtarët të jenë të gatshëm të japin gjithçka nga vetja e tyre për fanellën e Kosovës”.
