Një gazetare amerikane, Shelly Kittleson, është rrëmbyer në Bagdad nga një grup i armatosur irakian i dyshuar për lidhje me Iranin, kanë bërë të ditur Shtetet e Bashkuara të Amerikës, në një situatë kur siguria në rajon po përkeqësohet pas tensioneve SHBA–Iran.

Kittleson, e cila ka punuar për vite si gazetare e pavarur në Lindjen e Mesme, ka raportuar gjerësisht nga Siria, Iraku dhe Libani.

Departamenti amerikan i Shtetit tha se po punon për lirimin e saj “sa më shpejt të jetë e mundur”, ndërsa autoritetet irakiane kanë arrestuar një person të dyshuar dhe kanë sekuestruar një automjet të përdorur në rrëmbim.

Sipas autoriteteve të Irakut, ngjarja ndodhi në Bagdad, ku katër persona të veshur me rroba civile e rrëmbyen gazetaren dhe u larguan me shpejtësi me automjet. Një video vëzhgimi raportohet se tregon momentin e rrëmbimit.

Grupi i dyshuar lidhet me milicinë Kataib Hezbollah, ndërsa autoritetet po vazhdojnë kërkimet për lirimin e saj dhe kapjen e personave të tjerë të përfshirë, raporton The Guardian, përcjell KosovaPress.

Organizata mediatike Al-Monitor ka shprehur shqetësim të thellë dhe ka kërkuar lirimin e menjëhershëm të saj, duke theksuar rëndësinë e punës së saj raportuese nga rajoni.

Autoritetet amerikane kanë paralajmëruar më herët për rreziqet në rritje për qytetarët dhe gazetarët në Irak, ku grupet e armatosura pro-iraniane kanë ndikim të konsiderueshëm.