Një qytetar nga Fushë Kosova nuk e pati ditën e tij më të mirë, të mërkurën.

Kjo për faktin se atij i është vjedhur motoçikleta, për të cilën ka thënë se ka vlerë rreth 2 mijë euro.

Rasti është raportuar në polici, nga e cila kanë thënë se janë duke e hetuar këtë rast.

Të rëndë e pati ditën edhe një kosovar nga veriu i Mitrovicës, të cilit hajnat i kanë hyrë në depon e tij. Ai ka treguar në polici se ata i kanë vjedhur sende të ndryshme, vlera e të cilave nuk është bërë e ditur. Rasti, sipas raportit të forcave të rendit, është duke u hetuar, çfarë nënkupton se të dyshuarit nuk janë kapur.

Fat më të mirë se fushëkosovari dhe veriomitrovicasi pati një prizrenas. Atij i është kthyer një veturë, e cila i ishte vjedhur më 17 qershor. Kjo ndodhi pasi të mërkurën u gjet personi I dyshuar për këtë vepër, të cilit iu konfiskua edhe një pistoletë me 13 fishekë. I njëjti është dërguar në mbajtje. /KosovaPress/

/Kosovapress/