Për shkak të pamundësive financiare për të ndërtuar fusha të futbollit me bari natyral dhe kostos së lartë për mirëmbajtjen e tyre, pjesa dërmuese e fushave të futbollit në Kosovë janë të mbuluara me bari sintetik.

Kjo praktikë po konsiderohet të jetë e gabuar pasi fushat e tilla po ndikojnë jashtëzakonisht shumë në rritjen e numrit të lëndimeve të lojtarëve, por dyshohet se këto fusha mund të jenë edhe kancerogjene.

Si pasojë e këtyre kushteve, Maxhuni thotë se lojtarët e Superligës, po pësojnë këputje ligamentesh e dëmtime të miniskusit.

Përtej lëndimeve, problematikë e madhe e këtyre fushave po konsiderohet të jetë goma e zezë që e kanë në përbërje. Fizioterapisti Ervin Meqikukiqi ka thënë për KosovaPress, se kjo gomë mund të jetë kancerogjene, edhe pse deri më tani nuk ka konfirmime rreth kësaj çështje.

I shqetësuar me ndikimin negativ që kanë këto fusha është shprehur edhe ish-presidenti i klubit të futbollit Prishtina, Remzi Ejupi. Ai ka thënë se këto fusha janë tejet të rrezikshme, sidomos për lojtarët e grupmoshave të reja.

Duke parë këto të meta që kanë fushat me bari sintetik, njohësit e mjekësisë sportive kanë rekomanduar që ato të zëvendësohen sa më shpejtë me fusha me bari natyral, apo edhe me fusha sintetike të kualitetit më të lartë.