Finlanda do të mbyllë të gjitha vendkalimet, përveç një në kufirin me Rusinë, në përpjekje për të ndaluar fluksin e azilkërkuesve në atë vend nordik, njoftoi sot kryeministri Petteri Orpo.
Në nëntor, më shumë se 600 persona pa dokumente të vlefshme udhëtimi të BE-së hynë në Finlandë nëpërmjet Rusisë, duke bërë që Helsinki të mbyllte disa pika kalimesh dhe duke akuzuar Moskën për devijimin e emigrantëve.
Ministrja e Jashtme e Finlandës Elina Valtonen tha më herët sot se qeveria po shqyrton mbylljen e disa nga katër pikat e kalimit të mbetura në kufirin e saj me Rusinë apo edhe të gjithë kufirin nëse fluksi i azilkërkuesve nga vendi fqinj vazhdon.
“Ne tashmë kemi marrë masa për mbylljen e pikave kufitare dhe nëse është e nevojshme do të mbyllim edhe më shumë”, tha Valtonen në një intervistë, duke shtuar se mbyllja e të gjithë kufirit është një nga opsionet që qeveria po diskuton aktualisht.
Valtonen konfirmoi diskutimet e rojeve kufitare finlandeze dhe tha se autoritetet finlandeze kanë prova shtesë se shërbimi kufitar rus po transporton emigrantë në kufi, por nuk pranoi të zbulojë burimet e saj. Ajo shtoi se temperaturat në veri aktualisht po bien në minus 20 gradë Celsius, andaj kalimet janë të rrezikshme nëse emigrantët nuk janë të veshur siç duhet.
Është edhe kërcënuese për jetën të përdorësh mjete të tilla siç po përdor Rusia, tha Valtonen, duke shtuar se Finlanda u përpoq të fliste për këtë me Rusinë, por se Moska deri më tani ka refuzuar të bashkohet me dialogun.
