Finalja e Kupës së Botës mes Spanjës dhe Argjentinës është bërë ndeshja më e shikuar e futbollit në historinë e televizionit amerikan.

Spanja e mposhti Argjentinën me rezultat 1-0 pas vazhdimeve në stadiumin MetLife në New Jersey, me golin vendimtar në minutën e 106-të, duke siguruar titullin botëror.

Sipas të dhënave të Nielsen, finalja e së dielës u ndoq nga 62.8 milionë shikues në total në SHBA, duke thyer çdo rekord të mëparshëm për futbollin në Amerikë.

Ndarja e shikueshmërisë:

• 38.9 milionë në Fox në gjuhën angleze, me rritje 132% krahasuar me finalen e vitit 2022
• 23.9 milionë në Telemundo dhe Peacock në gjuhën spanjolle, me rritje 166% krahasuar me 2022 dhe rekord absolut për transmetimet në spanjisht

Transmetimi në Fox arriti kulmin me mbi 51.6 milionë shikues gjatë vazhdimeve.

Sipas kompanive, pothuajse gjysma e audiencës së Telemundos erdhi nga streaming, një rritje e madhe nga 30% që ishte në vitin 2022.

Vetëm në qershor, Fox One shtoi 2.8 milionë abonentë të rinj, ndërsa Peacock shtoi 3.75 milionë.

Ky ishte Botërori më i ndjekur ndonjëherë në SHBA edhe për shkak të faktit se u organizua në Amerikë, me ndeshje në SHBA, Meksikë dhe Kanada. Edhe ndeshjet e raundit të 16-të, si Meksikë - Angli, arritën gati 45 milionë shikues.

Me këto shifra, futbolli u konfirmua si sporti i dytë më i shikuar në SHBA pas NFL, duke lënë pas finalen e NBA dhe World Series të bejsbollit.

Tani FIFA pritet të hapë garën për të drejtat televizive për Botërorin 2030, ku pritet një luftë e madhe mes Fox, Telemundo, Netflix, Disney dhe YouTube.

KosovaPress