Besart Baruti është zgjedhur kryetar i Federatës së Karatesë së Kosovës në Kuvendin e jashtëzakonshëm të mbajtur më 4 korrik, kuvend ky që është thirrur pas dorëheqjes së 10 anëtarëve të bordit të deritanishëm të udhëhequr nga Avni Gashi, i cili thotë se vazhdon të jetë kryetar në fuqi i kësaj federate.

Sekretari i FKK-së, Nazmi Gashi thotë për KosovaPress se thirrja e kuvendit ishte e domosdoshme sepse pas dorëheqjes se bordit, as kryetari dhe as organet tjera nuk janë funksionale.

Por, këtë kuvend e quan të paligjshëm dhe të padrejtë, Avni Gashi, i cili thotë se është kryetar në fuqi i Federatës së Karatesë, duke shtuar se vazhdon ta ketë mbështetjen e shumicës së bordit të kësaj federate.

Sipas sekretarit të FKK-së, ndryshimet në këtë federatë kanë ardhur për shkak se anëtarët e bordit të Federatës kishin një varg pakënaqësish me udhëheqjen e Avni Gashit.

Por, Avni Gashi pretendon se të gjitha këto zhvillime po ndodhin për shkak të interesave personale e grupore, të cilat mund të sjellin edhe heqjen e licencës nga ana e Ministrisë së Sportit.

Mirëpo, sekretari Gashi thotë se nuk ka asnjë rrezik që Federata e Karatesë ta humbë licencën, derisa kërkon që Ministria e Sportit të mos ndërhyjë në çështjet e brendshme të kësaj federate.

Gjithë këtë situatë me kujdes është duke e vëzhguar Komiteti Olimpik i Kosovës. Presidenti Ismet Krasniqi thotë për KosovaPress se janë duke e pritur raportin e të dërguarit të tyre në këtë kuvend dhe pastaj do të japin vlerësimin nëse gjithçka ka shkuar sipas dispozitave ligjore sportive./A.Bytyçi

Lajmi i plotë është në sistemin me parapagim.

https://kosovapress.com/admin/spanja-nuk-lejon-karateistet-kosovare-te-marrin-pjese-me-simbole-shteterore-ne-kampionatin-evropian/

https://kosovapress.com/admin/gashi-spanja-ne-menyre-te-poshter-na-perjashtoi-nga-evropiani-i-karatese/