Sipas raportimit të gazetës argjentinase La Nación, Byroja Federale e Hetimeve e SHBA-së (FBI) ka nisur një hetim ndaj Federatës Argjentinase të Futbollit (AFA) për dyshime mbi pastrim parash dhe mënyrën se si janë kanalizuar fondet përmes sistemit financiar amerikan.

Hetimi fokusohet në aktivitetet financiare të AFA-së në Shtetet e Bashkuara dhe nëse gjatë këtyre transaksioneve janë kryer shkelje të ligjit.

Raporti pretendon se kompania TourProdEnter LLC, me seli në Florida, e cila menaxhon detyrimet financiare të AFA-së jashtë Argjentinës, është gjithashtu pjesë e hetimit.

Sipas dokumenteve të siguruara nga La Nación, kjo kompani ka administruar të paktën 260 milionë dollarë të ardhura të AFA-së, ndërsa rreth 57 milionë dollarë janë transferuar drejt kompanive dhe përfituesve, për të cilët nuk është gjetur një justifikim i qartë ekonomik.

"Përmes këtyre llogarive, TourProdEnter LLC menaxhoi të paktën 260 milionë dollarë të ardhura të AFA-së, ndërsa vetëm një pjesë e fondeve mund të lidhej drejtpërdrejt me shpenzime të identifikueshme operative," shkruan La Nación.

Gazeta shton se disa prej transfertave janë bërë drejt kompanive që, sipas dokumentacionit të analizuar, nuk ofronin shërbime të identifikueshme, ndërsa kontrolloheshin nga persona që figuronin si përfitues të ndihmave sociale në Argjentinë.

Deri në këtë moment, FBI nuk ka bërë një deklaratë zyrtare, ndërsa AFA dhe presidenti i saj, Claudio Tapia, nuk kanë reaguar publikisht ndaj raportimeve.

Hetimi mbetet në fazë paraprake dhe nuk janë ngritur akuza zyrtare ndaj federatës apo zyrtarëve të saj.

KosovaPress