Në Rusi po zhvillohen “zgjedhjet” presidenciale ku pritet të fitojë bindshëm Vladimir Putin. Në zgjedhjet presidenciale, Putin “ka kundërshtarë në parim” tre kandidatë Nikolay Kharitonov nga Partia Komuniste, Leonid Slutski LDPR ultra-nacionaliste dhe Vladislav Daponkov partia liberale Populli i Ri. Megjithatë, arsyeja e shëndoshë dikton që asnjë nga kandidatët nuk ka shans për ta kërcënuar Putin.

Qendrat e fundit të votimit në rajonin e Kaliningradit, një enklavë ruse në Detin Baltik, u hapën mëngjesin e sotëm. Rezultatet e para zgjedhore priten pas mbylljes së qendrave të fundit të votimit në Kaliningrad rreth orës 19:00. Presidenti ukrainas Volodymyr Zelensky tha se nuk ka legjitimitet në "zgjedhjet imituese" të Rusisë. Ai tha se mendon se Putin dëshiron të sundojë përgjithmonë. Sondazhet e jashtme tregojnë se Vladimir Putin ka fituar një shumicë të madhe në një "zgjedhje" presidenciale në Rusi që pati vetëm një rezultat të mundshëm. Sondazhet tregojnë se 87.8% e njerëzve votuan për presidentin aktual.

Më shumë se tetë milionë votues hodhën votat e tyre online në këto "zgjedhje presidenciale", sipas një zyrtari të komisionit zgjedhor. Kjo është hera e parë që votimi elektronik është përdorur në një "zgjedhje presidenciale" ruse dhe një nga ata që mori pjesë ishte Vladimir Putin, i cili u filmua të premten duke votuar me një klikim të vetëm të tastierës. Kreu i grupit të pavarur të monitorimit Golos (Zëri) tha më herët se përdorimi i votimit elektronik i bëri “zgjedhjet” edhe më pak të hapura ndaj shqyrtimit publik. Sistemi u përdor në zgjedhjet parlamentare tri vjet më parë në shtatë rajone dhe kandidatët e opozitës thanë në atë kohë se ai u privoi atyre fitoren.

Yulia Navalna, e veja e politikanit të ndjerë të opozitës rus, Alexei Navalny, votoi në "zgjedhje". Pas votimit në ambasadën ruse në Berlin, ajo tha se nuk kishte "asnjë mesazh" për Putin. Ajo e quajti liderin rus një vrasës dhe gangster që e çoi vendin e saj në luftë. “Bëhuni të guximshëm dhe një ditë do të fitojmë”, u tha ajo rusëve. Të paktën 74 persona janë arrestuar në Rusi për pjesëmarrje në aksione të ndryshme protestuese gjatë “zgjedhjeve” presidenciale. Organizata OVD-Info, e specializuar në monitorimin e represionit, njoftoi se arrestimet u kryen kryesisht në Kazan në Rusinë qendrore dhe në Moskë.

Në publikimin e asaj organizate joqeveritare, thuhet se numri i të arrestuarve mund të jetë më i madh, sepse anëtarët e saj mund të marrin informacione të reja me emrat e rinj të të arrestuarve. Shumë prej të arrestuarve kanë mbërritur në qendrat e votimit pikërisht në mesditë si pjesë e protestës “Mesdita kundër Putinit” që synon të shprehë kundërshtimin ndaj mënyrës së zhvillimit të zgjedhjeve. Mbështetësit e protestave përfshijnë mbështetës të Alexei Navalny, një aktivist që vdiq në një koloni penale të Arktikut muajin e kaluar. Disa votues u arrestuan në qendrat e votimit. Raporti thotë se një aktiviste u arrestua teksa po dilte nga shtëpia e saj në Shën Petersburg. Disa nga të arrestuarit u liruan shpejt.