Lionel Messi vazhdon të mahnisë botën e futbollit, ndërsa paraqitja e tij në rikthimin spektakolar të Argjentinës ndaj Egjiptit në Kupën e Botës 2026 ka marrë vlerësime edhe nga Zlatan Ibrahimovic.

Kampionët në fuqi të botës ishin pranë eliminimit pasi u gjendën në disavantazh 0-2 në duelin e 1/8 së finales, por Messi udhëhoqi përmbysjen e madhe. Ylli argjentinas shënoi golin e barazimit për 2-2, ndërsa Enzo Fernandez realizoi në minutat shtesë për t’i siguruar Argjentinës fitoren dramatike 3-2 dhe kualifikimin në çerekfinale.

Ibrahimovic, duke folur për “Fox Sports”, u shpreh i impresionuar me paraqitjen e kapitenit argjentinas.

“Messi u bë një kafshë dhe askush nuk mund ta kapte. Ai vazhdoi, vazhdoi dhe ky është ai që unë kam parë, ai me të cilin jemi mësuar dhe që ende po e shohim”, tha Zlatan.

Sulmuesi suedez theksoi se pavarësisht se Messi ka fituar gjithçka në karrierë, dëshira e tij për sukses mbetet e njëjtë.

“Ende mund të shohësh emocionalisht se sa shumë do të thotë kjo për të. Kujtoni që ai tashmë e ka fituar këtë Kupë të Botës. Ai ka fituar shumë trofe, Topin e Artë, gjithçka. Mund të ulem këtu dhe t’ju tregoj CV-në e tij dhe ajo duket perfekte. Por ai ende e dëshiron dhe kjo është mbresëlënëse”, shtoi Ibrahimovic.

Pas këtij triumfi, Messi kryeson listën e golashënuesve të Botërorit 2026 me tetë gola, një më shumë se ndjekësit më të afërt, Kylian Mbappe dhe Erling Haaland.

Argjentina në çerekfinale do të përballet me Zvicrën.

KosovaPress