Sportistët paralimpik janë dëshmi se kufijtë ekzistojnë vetëm në mendjen e njeriut”. Kështu u tha me rastin e hapjes së Lojërave Paralimpike “Kosova 2024”, ku lojëra në tetë disiplina, do të zhvillohen të shtunën dhe të dielën, në Vushtrri.

Në ceremoninë hapëse, presidentja e Komitetit Paralimpik të Kosovës, Njomza Emini, theksoi se kjo kategori e sportistëve është dëshmi faktike se sa larg mund të arrihet me besim dhe vendosmëri, pamarrë parasysh situatën në të cilën ndodhemi.

Ndërsa, drejtori i Akademisë së Kosovës për Siguri Publike Lastriot Jashari tha se ky institucion me mburrje vazhdon të përkrah aktivitetet e Komitetit Paralimpik duke dhënë kështu mesazh se shoqëria duhet të bashkëndjejë me këtë kategori dhe se ata janë pjesë vitale e shoqërisë dhe të barabartë në secilën fushë.

Gjithashtu, para nisjes së garave, u nënshkrua edhe marrëveshja ndërmjet Komitetit Paralimpik të Kosovës dhe KFOR-t, për pranimin e donacionit të karrocës për paraatletikë e nënshkruar nga presidentja, Njomza Emini dhe komandanti i KFOR-it në Kosovë, Enrico Barduani.

Barduani theksoi se paraatletët janë inkurajim për të lënë mënjanë dallimet dhe të fokusohemi në aftësitë tona.

Për dy ditë me radhë, parasportistët do të zhvillojnë gara në disiplina si vrapimi me karrocë, golballi për të verbër, xhudo, basketbolli në karroca, volejboll të ulur, tenis me karroca dhe boqa.