Futbollistët kosovarë po vazhdojnë të fitojnë gjithnjë e më shumë vëmendje në futbollin evropian, veçanërisht në Itali, ku disa prej tyre po luajnë në nivele të larta dhe po vlerësohen nga mediat dhe ekspertët e sportit.

Redaktori i sportit në gazetën prestigjioze italiane Corriere dello Sport, Fabio Donfrancesco, në një intervistë ekskluzive për KosovaPress, ka folur për vlerën e futbollistëve kosovarë që luajnë në Itali, derisa ka zbuluar edhe të ardhmen e dy yjeve të Kombëtares së Kosovës, Edon Zhegrova dhe Amir Rrahmani.

Fillimisht, Donfrancesco vlerëson nivelin e futbollistëve kosovarë dhe thekson se ata janë ndër lojtarët më të vlerësuar në kampionatin italian.

“Italia tani është një nga vendet më të mira ku ne kemi lojtarë shumë shumë të mirë. Futbollistët nga Kosova, e kam fjalën që ata luajnë në Itali janë të famshëm gjithashtu dhe ata vlerësohen ndër më të mirët. Kështu që mendoj se për ta është një mundësi e mirë për të rritur nivelet e tyre të të luajturit dhe për t'u bërë të njohur nëpër botë, jo vetëm në Evropë”, thotë fillimisht Donfrancesco.

https://youtu.be/dIcSZO9j24E

Sa i përket Zhegrovës, gazetari italian vë në pah rëndësinë që ka për një lojtar të luajë në një klub të madh italian, duke përmendur mundësinë që ai të vazhdojë karrierën në ndonjë ekip tjetër të Serie A.

“Edoni luan në Juventus, që është një nga ekipet më të famshme në Itali dhe jo vetëm në Itali dhe Juventusi ka fituar disa kampionate italiane. Nëse kujtohem mirë, saktësisht janë 36. Kështu që për të është një mundësi shumë e mirë të luajë në këtë ekip që natyrisht ky ekip zakonisht luan në gara evropiane dhe për të mendoj se është një mundësi e mirë gjithashtu të qëndrojë në Itali, mbase të shkojë në një ekip tjetër italian, pse jo?”, vijoi tutje Donfrancesco.

Por pse nuk po i beson Spalletti dhe ku mund të transferohet Zhegrova sipas Donfrancescos?

“Luciano Spalletti është e vërtetë një trajner shumë i mirë. Ai ishte trajneri i ekipit kombëtar italian në të kaluarën dhe ai është një nga mësuesit më të mirë të futbollit në Itali. Kështu që jam i sigurt që me Luciano Spalletti-n, ai mund të rritë nivelin e tij të lojës dhe përvojën e tij, natyrisht. Rreth tregut të futbollit, nuk e di, pse jo? Në Itali, ne kemi disa ekipe të mira ku ai mund të luajë. Dhe unë mendoj se disa ekipe italiane po e ndjekin atë dhe lojën e tij”, thekson ai.

Donfrancesco komenton edhe për mbrojtësin e Kosovës, Amir Rrahmani, duke theksuar se fakti që ai luan nën drejtimin e një trajneri të madh është një dëshmi e qartë e nivelit të tij të lartë në futbollin italian.

“Rrahmani është një lojtar shumë i mirë, mbrojtës qendror i ekipit të Napolit dhe
trajneri Antonio Conte është trajneri i këtij ekipi që kërkon shumë nga lojtarët e tij. Kështu që Napoli ka fituar kampionatin italian vitin e kaluar.
Këtë vit, nuk e di, por ai po lufton me ekipet e tjera, me Juventusin dhe veçanërisht me Interin nga Milano. Kështu që kjo është e vërtetë. Ai është një lojtar shumë i mirë dhe ai është një shembull shumë i mirë i vendit tuaj në Itali, i lojtarëve të mirë në Itali.”

Ai zbulon gjithashtu edhe një informacion të ri që lidhet me të ardhmen e Rrahmanit te Napoli.

“Unë ju jap një lajm shumë të ri rreth tij sepse unë fola dje me gazetarin tonë në Napoli që ndjek zakonisht ekipin e Napolit. Ai më tha se Rrahmani do të nënshkruajë një kontratë të re me ekipin e Napolit deri në vitin 2029. Kështu që për të është një zgjedhje shumë shumë e mirë të qëndrojë në Napoli sepse ai
mund të luajë natyrisht me lojtarë të tjerë shumë të mirë që tani janë në ekipin e Napolit”, bën të ditur Donfrancesco.

Në fund të intervistës, Donfrancesco flet edhe për përfaqësuesen e Kosovës dhe për mundësinë që ajo të befasojë në arenën ndërkombëtare, duke theksuar se niveli i ekipit është në rritje të shpejtë.

“Ekipi i Kosovës do të luftojë tani në këtë garë botërore shumë të rëndësishme. Sidoqoftë, mendoj se te Kosova niveli po rritet shumë shumë shpejt. Dhe unë do të jem shumë i argëtuar të shoh ekipin e Kosovës sepse mendoj se mbase, pse jo, do të jetë një surprizë shumë e mirë për të gjithë”, përfundon ai.

Kosova do ta zhvillojë ndeshjen e radhës në playoff-in e FIFA World Cup 2026 kundër Slovakia national football team më 26 mars./A. Bytyqi