Deputetja e zgjedhur e Lidhjes Demokratike të Kosovës, Hykmete Bajrami, ka kërkuar zgjedhje të brendshme në këtë parti.

Bajrami tha se zgjedhjet e brendshme në LDK janë zgjidhja, teksa kërkoi që të sillen me dinjitet, pasi sipas saj, pozitat nuk janë të përhershme.

“E kam thënë edhe në janar se në LDK përgjegjësia politike nuk mund të jetë selektive dhe se pas një rezultati të rëndë zgjedhor, duhet të ketë reflektim, përgjegjësi dhe zgjedhje të brendshme. Atëherë kam kërkuar dorëheqjen e kryetarit dhe kam dhënë dorëheqje të parevokueshme nga pozita e nënkryetares, sepse besoja dhe vazhdoj të besoj se standardet duhet të vlejnë për të gjithë”, shkroi Bajrami në ‘Facebook’, transmeton KosovaPress.

Tutje, ajo iu drejtua kryetarit të LDK-së, Lumir Abdixhikut, se parimi që kush humb merr përgjegjësinë dhe lëshon rrugë, duhet të zbatohet pa përjashtim.

“Më pas, LDK-ja mbajti Kuvendin e partisë, ku kryetari e vendosi mandatin e tij në votim. Aty, rreth 45% e delegatëve u deklaruan në favor të dorëheqjes së tij. Ky ishte një tregues i qartë se partia kishte nevojë për reflektim të thellë dhe për ndryshime të domosdoshme. Por kryetari vendosi të vazhdojë, madje me kompetenca të zgjeruara nga po ai Kuvend”, shkroi tutje Bajrami.

Bajrami tha se problemet që i kishin identifikuar në janar, nuk janë adresuar asnjëherë dhe se qëndrimi i saj, tha ajo, se nuk ka ndryshuar.

“Sot, pas një rezultati tjetër zgjedhor që e la LDK-në përsëri në vendin e tretë dhe pas kërkesave publike të disa degëve për përgjegjësi politike, bëhet edhe më e qartë se problemet që i kishim identifikuar në janar nuk janë adresuar asnjëherë. Qëndrimi im nuk ka ndryshuar. LDK-ja ka nevojë për reflektim të sinqertë, përgjegjësi politike dhe hapje të një kapitulli të ri që rikthen besimin e anëtarësisë dhe të qytetarëve”, shkroi ajo.

Dje, Dega e LDK-së në Pejë dhe ajo në Lipjan i kanë kërkuar kryetarit të LDK-së, Lumir Abdixhiku, që të japë dorëheqje pas rezultatit të fundit zgjedhor, ku LDK-ja renditet e treta me 16.69%.

Pas kërkesës së këtyre dy degëve reagoi edhe vet Abdixhiku, duke thënë se “në komuna ku kemi qeverisje, të dalim të tretët tregon vetëm dozën e një sabotimi të thellë dhe të një projekti që nuk është i LDK-së”.