Fabio Cannavaro e ka konfirmuar largimin e tij nga Udinese pavarësisht se ka siguruar mbijetesën e klubit në Serie A këtë sezon.

Fituesi i Kupës së Botës 2006 mori përsipër detyrën te Udinese në fund të prillit, duke mbikëqyrur dy fitore dhe tre barazime në gjashtë ndeshjet e tij në krye, të mjaftueshme për të parë që klubi të mos rrëshqasë në Serie B në ditën e fundit të sezonit, raporton KosovaPress.

Pavarësisht se ka gjetur sukses në Kinë me Guangzhou Evergrande, Cannavaro nuk ka arritur të gjejë pozitën e tij në kampionatin e futbollit italian, vetëm duke menaxhuar një periudhë të shkurtër prej 17 ndeshjesh në krye të Beneventos në Serie B para dy muajve të tij me Udinesen.

Siç njoftoi në profilin e tij në “Instagram”, Cannavaro nuk do të nënshkruajë kontratë të re me Udinesen dhe do të largohet nga klubi në ditët në vijim, duke u informuar për planet e tyre nga presidenti Giampaolo Pozzo.

“Presidenti Pozzo më komunikoi sot vendimin e klubit për të mos vazhduar marrëdhënien tonë profesionale. E falënderoj për mundësinë që më dha dhe më vjen keq që nuk mund ta vazhdoj këtë rrugëtim të shkurtër por intensiv, i cili në muajin e fundit të sezonit na ka bërë të kryejmë një sipërmarrje të madhe dhe emocionuese.

Dua të theksoj se nga ana ime do të kishte pasur dëshirë për të vazhduar këtë aventurë në Friuli, një tokë që ka hyrë në zemrën time si dhe njerëzit e saj, dhe për këtë arsye e kisha vënë veten në dispozicion të klubit pa kushte.

I uroj klubit, lojtarëve dhe tifozëve të mrekullueshëm të Udineses sukseset më të mira”, shkroi Cannavaro në “Instagram”.