Autoritetet izraelite publikuan emrat e nëntë personave të vrarë pasi një raketë balistike iraniane goditi një lagje rezidenciale në qytetin qendror Beit Shemesh.

Ky sulm u quajt më vdekjeprurësi me një raketë të vetme brenda Izraelit që nga shpërthimi i konfliktit aktual me Iranin, më 28 shkurt.

Dy persona ishin konfirmuar si të vdekur, më herët.

Viktimat e identifikuara janë Gabriel Baruch Revach, 16 vjeç; Oren Katz; Sara Elimelech dhe vajza e saj Ronit; si dhe Bruria Cohen bashkë me djalin e saj, Yossi. Emrat e fundit të publikuar ishin vëllezërit e motrat Yaakov, Sara dhe Abigail Biton, të moshës 13 deri në 16 vjeç.

Presidenti Isaac Herzog vizitoi, të hënën, të lënduarit në Qendrën Mjekësore Hadassah–Ein Kerem në Jerusalem, si dhe vendin e shkatërrimit në Beit Shemesh, raportoi agjencia izraelite e lajmeve TPSIL, përcjellë KosovaPress.

“Gjatë gjithë natës, ekipet e kryetarit të bashkisë po mblidhnin mbetjet dhe pjesët e trupave. Ne lutemi për viktimat dhe lutemi bashkë me familjet, dhe shpresojmë që ato të gjejnë ngushëllim,” tha Herzog.

“Jemi në mes të një faze shumë të rëndësishme në histori. Kjo fazë do të përcaktojë drejtimin e Lindjes së Mesme. Ekziston një mundësi unike për të ndryshuar rrjedhën. Në vend të terrorit dhe shkatërrimit të pafund të krijuar nga perandoria e së keqes nga Teherani, do të ketë një ndryshim që do të ofrojë shpresë dhe paqe për një koalicion kombesh që është ngritur dhe po lufton kundër perandorisë së së keqes,” shtoi presidenti.