Zëvendësministri në detyrë në Ministrinë e Mjedisit dhe Planifikimit Hapësinor, Driton Hyseni, ka ftuar qytetarët e Podujevës, Llapit dhe Gollakut që t’i bashkohen tubimit të madh të Lëvizjes Vetëvendosje, i cili do të mbahet sonte nga ora 20:00 në Sheshin e Qytetit në Podujevë.

Përmes një video-mesazhi, ish-deputeti Hyseni tha se në këtë tubim do të marrë pjesë edhe kryeministri në detyrë, Albin Kurti, i cili do të prezantojë programin qeveritar, si dhe kandidatët e LVV-së nga Podujeva.

“Qytetarë të dashur të Podujevës, Llapit e Gollakut, ju ftojmë që sonte t’i bashkoheni tubimit të madh të LVV-së këtu në Podujevë, në orën 20:00 në Sheshin e qytetit. Aty do t’ju drejtohet kryeministri në detyrë, Kurti, me shpalosjen e programit qeveritar dhe gjithashtu do të bëhet prezantimi i kandidatëve nga Podujeva. Ju mirëpresim dhe mirë u takofshim”, deklaroi Hyseni në video-mesazh të publikuar në Facebook.

Tubimi organizohet në kuadër të aktiviteteve të fushatës zgjedhore të Lëvizjes Vetëvendosje në Podujevë.

/Kosovapress/