Dy persona janë arrestuar nga Policia e Tiranës dhe një i tretë është vënë në kërkim gjatë operacionit policor “Çikago”, i ndërmarrë me qëllim goditjen e një grupi të trafikut të drogës nga SHBA-të drejt Shqipërisë përmes shërbimit postar.

Personat e arrestuar janë G. D., 23-vjeç, dhe një 16-vjeçar. Gjithashtu u shpall në kërkim shtetasi S. K., 23-vjeç.

Në cilësinë e provës materiale u sekuestrua 5 kg kanabis sativa, me përqindje të lartë THC, me vlerë 90.000 euro nëse do të shitej te përdoruesit, e ndarë në pako, pesë aparate celulare, 8.000 euro dhe shuma të tjera parash.

Operacioni u zhvillua nga Seksioni për Hetimin e Narkotikëve, në bashkëpunim me Drejtorinë e Hetimit Doganor në Drejtorinë e Përgjithshme të Doganave, në drejtimin e Prokurorisë së Juridiksionit të Përgjithshëm Tiranë.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale, thuhet në njoftimin e policisë.