Ambasada e Gjermanisë në Tiranë ka dënuar ashpër aktet e dhunës të regjistruara gjatë protestës së djeshme të organizuar nga Partia Demokratike. Përmes një deklarate zyrtare, selia diplomatike i ka cilësuar të papranueshme sulmet me molotovë dhe mjete piroteknike ndaj institucioneve shtetërore dhe forcave të rendit, ku mbetën të lënduar gjashtë punonjës policie.

Në deklaratën e saj, ambasada vuri në dukje se ndonëse protestat janë një shtyllë e demokracisë, ato nuk mund të shërbejnë si mburojë për veprime të jashtëligjshme.

“Protestat politike dhe e drejta për të demonstruar janë të drejta themelore në çdo shoqëri demokratike. Por ato nuk mund të përligjin asnjëherë dhunën ndaj personave apo objekteve,” thuhet në qëndrimin zyrtar të ambasadës.

Thirrje liderëve politikë

Diplomacia gjermane i ka bërë një thirrje të drejtpërdrejtë lidershipit të Partisë Demokratike dhe forcave të tjera organizatore të protestës që të mbajnë përgjegjësi për mbarëvajtjen e tubimeve. Ambasada kërkon që përfaqësuesit politikë të distancohen “në mënyrë të paekuivoke” nga çdo akt dhune që minon rendin publik dhe sigurinë e qytetarëve e policisë.

“Ambasada Gjermane dënon dhunën e papranueshme në kuadër të demonstratave të djeshme. Protestat politike dhe e drejta për të demonstruar janë të drejta themelore në çdo shoqëri demokratike. Por ato nuk mund të përligjin asnjëherë dhunën ndaj personave apo objekteve. Ne kërkojmë prej përfaqësuesve të partive politike përgjegjëse të distancohen në mënyrë të paekuivoke nga dhuna.“, thuhet në mesazhin e ambasadës gjermane në Tiranë.

Bilanci i protestës

Protesta e djeshme u shënua nga tensione të larta përpara godinave qeveritare. Sipas raporteve zyrtare:

6 efektivë të Policisë së Shtetit morën ndihmë mjekësore pas goditjeve me mjete piroteknike.

Janë regjistruar dëmtime materiale në fasadat e institucioneve dhe infrastrukturën rrugore.

Hedhja e vazhdueshme e bombave molotov krijoi vatra zjarri në disa pika pranë kordonit policor.

/Kosovapress/