Naim Murseli dhe Granit Plava janë dënuar me burgim të përjetshëm për vrasjen e Liridona Ademaj në nëntor të vitit 2023. Ndërsa me 30 vjet privim nga liria u dënua Kushtrim Kokalla, raporton KosovaPress.

 Ky vendim i Gjykatës Themelore të Prishtinës u bë sot i ditur nga kryetarja e trupit gjykues, Fatmire Dërmaku.

“Në emër të popullit shpall këtë aktgjykim: I  akuzuari Naim Murseli është fajtor për veprën penale për vrasje të rëndë, në bashkëkryerje i akuzuari Granit Plava  është fajtor për veprën penale të kryer në bashkëkryerje, vrasje e rëndë, i akuzuari Granit Plava konform nenit 64 është fajtor për veprën penale mbajtje e posedim të armës. Kushtrim Kokalla është fajtor për veprën penale ndihmë në kryerjen e veprës penale vrasje e rëndë. Gjykata në bazë të dispozitave gjyqësore të KPRK të akuzuarit i gjykon Naim Murseli dhe Granit e iu shqipton dënim me burgim të përjetshëm. Kushtrim Kokalla i shqiptohen dënim me burgim me 30 vjet”, tha ajo.

Në fjalën përfundimtare, prokurorja e rastit, Javorka Përlinçeviq ka kërkuar burgim të përjetshëm për tre të akuzuarit për vrasjen e Liridona Ademajt. Sipas saj, kjo vrasje ishte e planifikuar.

Ndërsa, burgim të përjetshëm për Naim Murselin, Granit Plavën dhe Kushtrim Kokallën kërkoi edhe vëllai i të ndjerës, Liridonës, Leonard Ademaj. Kërkesë të njëjtë pati edhe avokati i familjes Ademaj, Leutrim Syla.

Mbrojtësit e të akuzuarve në rastin e vrasjes së Liridona Ademajt kanë paraqitur qëndrimet e tyre përfundimtare para gjykatës, duke kërkuar vendime të drejta dhe të bazuara në prova.

Mbrëmjen e 29 nëntorit të 2023-ës, Liridona Ademaj u vra në një rrugë në fshatin Bërnicë të Prishtinës, teksa ishte në veturë bashkë me bashkëshortin Naim Murselin dhe dy fëmijët e tyre.

Sipas aktakuzës Naim Murseli e planifikoi vrasjen e ish-bashkëshortes së tij, Liridona Ademaj me qëllim që të përfitonte nga sigurimi i saj jetësor në Suedi, në vlerë prej rreth 260 mijë eurosh.

Aktakuza thotë se Kushtrim Kokalla e kishte njoftuar Naim Murselin me  Granit Plavën, i cili akuzohet si dorasi.

Naim Murseli, Granit Plava dhe Kushtrim Kokalla të shpallur fajtor për vrasjen e Liridona Ademaj nuk ishin të pranishëm në sallën e gjyqit në momentin kur iu shqiptua dënimi.

Sipas Prokurorisë, ai kishte kryer vrasjen në këmbim të 30 mijë eurove nga Murseli.

/Kosovapress/