Sekretarja e përgjithshme e Partia Demokratike e Kosovës, Vlora Çitaku, ka kritikuar ashpër veprimet e kryeministrit Albin Kurti, duke e akuzuar për mosrespektim të situatës institucionale në vend.

Sipas saj, në rrethanat aktuale kur Kuvendi konsiderohet i shpërndarë dhe qeveria në dorëheqje, veprimet e ekzekutivit nuk reflektojnë kufizimet që duhet të ketë një qeveri në këtë fazë. Çitaku thekson se Kurti po vazhdon me emërime të zëvendësministrave, hapje të konkurseve për pozita të larta në shërbimin civil, si dhe vendime për emërime e shkarkime, sikur situata politike të jetë e zakonshme.

Ajo e cilëson këtë qasje si jo institucionale, duke shtuar se bëhet fjalë për një “mentalitet abuzues ndaj shtetit”.

Sipas Çitakut, kur pushteti i trajton institucionet si pronë private, dëmtohet demokracia dhe nënçmohen qytetarët.

Mbrëmë kryeministri në detyrë i Republikës së Kosovës, Albin Kurti, ka emëruar Hysni Mehani në pozitën e zëvendësministrit në Ministrinë e Financave. Kurse, Agon Batusha në pozitën e zëvendësministrit në Ministrinë e Administrimit të Pushtetit Lokal.

/Kosovapress/