Kryetari i Komunës së Podujevës, Shpejtim Bulliqi, ka reaguar pas konfirmimit se është gjetur trupi i pajetë i të riut në Liqenin e Batllavës.

Blerim Ruhani humbi jetën pasi u zhduk derisa po notonte. Rasti u raportua të martën rreth orës 13:00, kur Policia e Kosovës u njoftua se një person kishte hyrë në ujë dhe nuk ishte parë më të dilte.

Përmes një reagimi publik, Bulliqi i ka shprehur ngushëllime familjes së viktimës, në emrin e tij personal dhe në emër të Komunës së Podujevës.

“Në emrin tim personal dhe të Komunës së Podujevës, u shpreh ngushëllimet më të sinqerta familjes për humbjen e më të dashurit të tyre”, ka shkruar Bulliqi.

Kryetari ka falënderuar gjithashtu të gjitha institucionet dhe qytetarët që morën pjesë në operacionin e kërkim-shpëtimit, përfshirë Forcën e Sigurisë së Kosovës, Policinë e Kosovës, zjarrfikësit, Qendrën Kryesore të Mjekësisë Familjare në Podujevë, si dhe qytetarët që kontribuuan në këtë aksion.

Në fund të reagimit, Bulliqi ka shprehur dëshirën që raste të tilla tragjike të mos përsëriten.

Pas dy ditësh kërkime, ekipet e FSK-së arritën të lokalizojnë dhe nxjerrin nga uji trupin e pajetë të 25-vjeçarit. 

/Kosovapress/